眨吓眼馬季又開鑼，咁啱呢兩日又遇上熱帶風暴「瑪娃」。馬會一向有運，跑馬日多數天公造美，就算日前新馬季舉行拜神儀式，馬會CEO應家柏都講笑話馬會識揀啱日子，而試閘嘉年華亦冇受天氣影響。

新一季馬會都有唔少新轉變，近排最多馬迷談論嘅，自然係場內現場評述同賽馬節目主持有好大變動，據聞馬會一直收到唔少馬迷嘅投訴同意見，希望喺賽事直播同賽馬節目質素方面作出改善，今次大執位好大程度有回應公眾嘅負評，可以話係從善如流，亦可以話係終於肯面對現實。其實影視部肯試吓改善，點計都係好事，初步外界反應都好支持。

今季喺現場評述同賽馬節目主持，加入咗唔少馬迷比較陌生嘅新面孔。其實馬會喺暑假期間特登搞咗個英國交流團，帶咗一批年輕人去外地實地考察。呢個交流團就係希望提升一班新人嘅賽馬知識，亦順便揀蟀，今季嘅幾個新主持，大部份都有參加交流團，可見馬會換人唔係全冇部署。

其實馬會自己投放資源培訓年輕評馬人，都係正確嘅方向，今時今日傳媒已經冇乜資源培訓人才，與其評馬人才供不應求，馬會自行培訓至係長遠嘅出路。訓練新人之餘，都要畀機會佢哋試吓實戰，今季將唔同嘅新面孔分散喺各直播同節目環節，藉原有主持帶新人，起碼會畀到觀眾一啲新鮮感。

肯試肯變值得鼓勵，但出嚟嘅效果係點，事前冇法預計。馬迷嘅意見好直接清晰，都係睇表現，今季做得唔合格嘅主持，下季一樣可以再換。

阿Joe