性騷擾受害者通常係女性，不過，據美國就業機會平等委員會統計顯示，越嚟越多美國男性投訴喺公司俾人性騷擾。該委員會舊年總共處理咗1.21萬宗性騷擾投訴，其中15.4%受害者係男性，遠高過10年前嘅11.6%。
JAdM喺《MSNBC討論區》話：「我喺一間小學飯堂打工，係唯一嘅男廚師，經常俾一個女同事性騷擾。我上司有日見到我俾人『抽水』，於是幫我向校長投訴，後來呢位女同事被調職。」

叛逆性騷擾真人騷

喺酒吧做男侍應嘅MtBiker2002話：「我曾經俾一個女同事鹹豬手，叫佢停手時，佢居然話要向老闆投訴我性騷擾佢，仲惡人先告狀話：『你估老細信我定信你？』，我惟有啞忍，後來劈炮唔撈。」
SomeRandomGuy講：「我公司有好多女職員，佢哋經常講有關男同事嘅黃色笑話，或者互相傳遞色情電郵，我忍無可忍，於是向班女同事發放黃色電郵報復。」
美國聯邦陪審團今年2月裁定，3名被上司性騷擾嘅男士可獲賠償22.5萬美金（約175.5萬港元）。
專家話，越嚟越多男員工投訴被性騷擾，其中一個原因係女上司嘅數目多過10年前。