當年今日
關於我們

【車Cam直擊】木頭累炒鐵騎士 電單車無人駕駛落馬灣?

蘋果日報 2018/09/27 23:10

爆相爆片車Cam直擊

青馬大橋傍晚6點幾發生咗一宗交通意外,有個鐵騎士揸住部電單車沿快線向機場方向行駛,但突然間部電單轆過路面一碌木頭嘅物體,結果鐵騎士避唔切搞到翻車,佢仲跌喺地上面係咁轆係咁轆,而部電單車則無人駕駛繼續行,向左飄過兩條行車線去到慢線,駛上往馬灣的分义路路邊先停低。
事發時讀者余先生就揸住部私家車喺中線行緊,佢見到事發經過,向《蘋果》提供車Cam片。可以見到當時部電單車沿快線行駛,前面有部綠色的士,部的士已經過咗路上嗰嚿障礙物,但電單車隨後駛到嚟就避唔開,轆過嗰嚿似係木頭嘅物體,導致人仰車翻。
余先生當時見到個鐵騎士跌咗落地之後係咁轆,佢都即時收慢架車,仲扭軚閃避由中線慢慢行番慢線,好彩佢部車就無輾過鐵騎士。而部電單車則繼續行駛,無人狀態下繼續駛向馬灣的支路。余先生形容當時鐵騎士全身裝備,車速亦唔算快,但轆過路面嗰舊障礙物時就食到應一應,仲話如果佢小心啲留意路面,應該可以預早避開嘅。好彩余先生話之後由後鏡望到,個鐵騎士可以自己起番身,仲識得避開後面嚟啲車,跑返去路邊,總算執番身彩。
警方就話事件中嗰位25歲姓謝鐵騎士,自己報案話遇到交通意外受傷,佢事後被送咗去瑪嘉烈醫院治理。
empty
電單車轆過木頭後失控彈起,鐵騎士跌在快線上,而電單車則繼續行駛。(讀者余先生提供)