回家了！回家了！唔係幾百萬個民工，而係被指做間諜嘅資深新聞工作者程翔，佢俾囚禁千幾日後，噚日終於恢復自由返到香港，八方祝佢哋一家人齊齊整整過新年，身體健康。早唔放，遲唔放，點解噚日突然放程翔呢？各界人士諸多揣測，有人指因為北京舉行奧運在即，放咗程翔可以改善國家形象，亦有人話多得特首煲呔同其他有力人士出力，令阿爺大發慈悲。
程翔年前忽然被控間諜罪，有一個說法指可能同中南海最高層權鬥有關，事關同案嘅學者陸建華據稱係國家主席胡錦濤智囊，程翔隨時係宮廷內鬥犧牲品。溫總早前南下視察災情，承諾盡快畀滯留嘅人歸家，莫非真係話中有話，權鬥平息，暗中向廣州有關方面下達指示釋放程翔？

港府撥2.1億賑災

巧合地立法會噚日通過撥款2.1億元賑濟內地災民，唔通香港人對受災同胞同情心感動到國家領導人，令佢哋放過程翔？程翔因乜原因獲釋可能都唔重要，最緊要係佢真正獲得自由，呢個相信亦係送豬迎鼠最大喜訊，喺寒冬之下，八方都感到香港真係好溫暖，好似煲呔噚日話，雖然只係國家入面一方有事，但八方都會提供援助。佢唔係指李八方，係泛指四方八面嘅人士。
煲呔噚日同太太去維園花市後開腔攞彩，話程翔獲釋值得歡喜，祝佢一家團聚，身體康健，闔府平安。佢喺花市使咗600幾蚊買嘢，買咗一對鯉魚咕𠱸等家居擺設，又用「開心價」388蚊買咗盆蘭花，幾個檔主都讚煲呔買嘢唔講價，係好客仔。
煲呔買嘢好疏爽，議員卻批評港府賑災勒住勒住，只係申請2.1億元，對內地數以百萬計災民真係杯水車薪。八方相信如果有需要，港府應該會再伸出援手，𠵱家庫房水浸，批多幾個億完全唔係問題啦。程翔回家了，幾百萬民工卻仍然回鄉無期，仲有一個人可能唔可以喺新年前同家人團聚，就係被指發佈疑似藝人淫照而被還柙嘅網民鍾亦天。
香港人牽掛程翔，好關心風雪下有家歸不得嘅同胞，亦冇忘記鍾亦天，本地網民更發揮可能係網絡世界前所未有嘅守望相助精神，自發籌錢幫佢，唔單止顯示香港人間有情，更反映大家秉持公義嘅精神，不論係現實世界天災，定係網絡世界人禍，總之只要有需要，大家都會伸出援手。