仲有不足一個月就係九龍西補選投票日，各個候選人都積極備戰，九西街頭巷尾都會見到街站宣傳。代表民主派出戰嘅工黨李卓人日前就帶埋一班靚女靚仔去到黃埔街站為佢拉票，呢班靚女靚仔原來係來自港龍航空公司空勤人員協會。唔止落街站，佢哋更加為阿人拍攝宣傳片，結果放上網未夠一日，已有逾7,000人睇過，逾百人分享，靚女果然特別吸睛。

八方日前就訪問過片中打頭陣嘅靚女空姐Angela。Angela話，阿人過去幫港龍工會爭取過好多嘢，例如空姐之前只可以着裙，到最近可以着褲，就係多得阿人幫手成功爭取，所以佢今次都會力撐阿人。

反對填海　立場鮮明

Angela又話，自己一直都好關注東大嶼填海興建人工島嘅問題，所以好支持阿人政綱中，表明反對興建人工島嘅立場，佢又話雖然公餘時間落區拉票辛苦但仍覺值得，直言「我哋係為香港人吖嘛！」

另外，李卓人同劉小麗噚日亦都舉行聯合記者會，關注土瓜灣及紅磡區一直承受旅客過多問題，佢哋更加就此進行咗調查。調查發現，255名受訪者之中，超過86%人認為現時土瓜灣及紅磡區嘅旅客數目過量，超過9成人仲話唔會去專門接待旅客嘅商舖。佢哋建議要成立旅監局，規管住宅附近商店不宜作旅遊項目，平衡居民利益同旅遊業嘅發展。

九西補選候選人仲有陳凱欣、馮檢基、伍廸希及曾麗文。

李八方