雷神莫雷拉騎功超群，作為頂級練馬師的大摩當然識貨，兩人過去曾有段關係密切的歲月，單是一匹黑衣巨人「步步友」，已攜手取得豐功偉績。

之後兩人似乎日漸疏離，不過上季仍合作得六Win，然而到了今季雷神任蔡約翰主帥，便沒有再騎摩廐馬了。

然而，這情況將有改變，嚟緊禮拜三（23日）快活谷夜賽，大摩季內首次有馬交予雷神出賽，就是角逐四班1650米的「活力勇士」。

大摩肯伸出友誼之手，雷神當然珍惜機會，必想交出佳績重新打好關係，畢竟雷神未來或轉番做公司騎師，同大摩大把合作空間。何況「活力勇士」肯定是牌面馬，雷神自然食得唔好嘥。

睇賽績，「活力勇士」明顯開始成熟進步，近兩仗俱於同程谷草一哩入Ｑ，兩次夾埋輸唔夠一馬位，已站喺勝利邊緣。

此駒是匹五歲本地拍賣馬，身價高達750萬，仍未開齋大摩冇壓力就假，所以今次換雷神，多少因為大摩想借助雷神騎功，希望可有突破，台前幕後鬥志毋須懷疑。