韓劇《繼承者們》男星李敏鎬，上個月先旋風襲港舉行粉絲見面會，當時李敏鎬有話過11月會再度訪港開演唱會，其實粉絲唔使等咁耐，因為李敏鎬又會嚟香港，仲要提早兩個月，會係9月再度訪港，為佢代言嘅飲品做宣傳，到時粉絲們又要追星喇。

如果追開韓星嘅粉絲，應該都知道8月有唔少韓星嚟香港，好似少女時代（少時）、蘇志燮、金宇彬、JYJ等，而少時就會同BAP、100%等率先嚟港，出席後日（2號）喺亞博館舉行嘅「BestofBest」演唱會。

少時會於後日下午近1時抵港，之後就即趕到亞博館為晚上嘅演唱會做準備，當日仲係少時出道七周年嘅大日子。