成龍噚日出席新片《神探蒲松齡之蘭若仙蹤》發佈會，當司儀問到現在嘅年輕演員同佢以前嘅狀態有咩分別，佢即大聲反問：「現在的年輕人……」司儀笑一笑向成龍撒嬌：「我問錯了嗎?」全場大笑，成龍感慨：「他們太幸福，他們太太太太太太太太太幸福，忠告所有年輕演員把握好機會，不要被這個時代某些原因寵壞了他，有些所謂的經理人、電影公司也要教導他們，有些年青人走歪路，不是他的錯，他們根本不知道錯，一上來就是這樣，後面的人教導他，我們當年是苦過來。」

成龍又指年輕人要認真守時敬業，要學識感謝台前幕後嘅工作人員，甚至抨擊現時大陸年輕明星出門，排場大，有八至十個助理跟住，成龍激動講：「不是人多就顯示你是大明星，一定要遵守片場的規矩、準時到、要感謝台前幕後的人，因為是他們把你變成大明星。」成龍稱呢番說話只有自己敢講，因為自己拍咗五十幾年電影，當然有資格去講!

成龍喺台上要求年輕演員尊敬工作人員，又叫在場記者想知一個演員係唔係敬業，人品好唔好，應該私下去問劇組人員，成龍之後又話自己曾公開誇一啲合作過嘅演員，有時係摸住良心講，成龍話：「有時候你問我跟那個合作好不好，好!真的很好，識演戲又準時，有時我真係摸着良心講假話，那沒辦法，對住那麼多媒體面前，必須要講他好，你們最好是……私底下去劇組人員，我常常聽木工、茶水說，我說你們應該組一個圈，誰在片場態度壞、誰常常遲到，他們最清楚。」成龍無奈呼籲啲記者去劇組探訪，親身睇同感受，記錄所有演員同電影工作者嘅工作狀態。

呢段片喺微博瘋傳，引起大陸網民熱話，大家都估成龍口中嘅曾經摸住良心讚嘅「小鮮肉」係邊個，有網民矛頭無啦啦指向黃子韜，黃子韜真係躺著也中槍，啲網民指成龍同黃子韜拍電影《鐵道飛虎》宣傳時，曾點名主動讚黃子韜，當時記者提問同年輕演員合作，成龍都有講好說話，而黃子韜fans則為偶像抱不平，希望網民唔好歪曲事實、顛倒黑白，而且黃子韜、楊冪及張藝興等曾與成龍合作嘅藝人都忽然被提起。

此外，其實成龍前年都批評過「大陸小鮮肉」熱潮，慨嘆新演員太錫身，大多搵替身上陣，拍動作戲都係去武館學幾個動作就算，成龍又話見過一個年輕演員拍動作戲手部受傷，即大叫兼喊晒，結果劇組800幾人圍住睇佢點。

精選娛聞，喺晒《娛果》
http://fb.com/appledailyent