沈集成剛戰憑「競駿高飛」順利延續超強勢頭，最近他的成功絕對有賴一大批質新馬火速冒起。沈廐質新馬陣上有接近演出後，操練便馬上進行壓迫，賽前試大閘及最後試跑拍跳，呢招近期萬試萬靈；「曦世之寶」、「競駿高飛」等就係最佳例子。今次第五場「眼光獨到」又係呢招殺手鐧，識跟一定跟埋呢鋪。
「眼光獨到」最近兩場明顯越跑越好，前次跑嫌短之1200米蝕位後亦肯追，剛戰因檔位問題被迫留到最後，同樣蝕位無數後追近。馬匹帶點懶性，落腳亦慢，看來用硬功騎師必定更好。今仗既排得好位，又有快馬「多個世界」、「雅寶」、「雙龍出海」做步速，只要中段取得二疊遮擋位置，末段當可憑其蠻勁一攻而破。
第二選要「育成群駒」，抹去上場慢步速走外疊之賽績，其實已連續六場衝得十分接近，表現踏入穩定期，今次小休一個月再來，以巫斯義經常走外疊之騎法，正合用法A跑道，正路配腳。
至於熱門中，「藍雪山」上場賽績固然好，但田泰安處理一些韁口欠佳馬常會出現鬥口情況，再加上排內檔，受阻風險大，要考慮值博率。
半冷推介第三場「首飾多寶」，今季跑1800米或以上草地三次全部接近，看來性能已改變；今場對手似是而非，萬事俱備，如落雨更要調升評級！