日本雖然之前將消費稅由5%加到8%，但擴大咗免稅品範圍，除以往衣服、電器、手袋等買滿逾1萬日圓可退稅外，港女摯愛嘅化妝品、各式藥品、食品等，𠵱家買夠5,001日圓都有得退，唔怪得費清去到大阪shopping勝地心齋橋，貼上Duty free海報嘅藥妝店開到成行成市，重要間間都俾中港台旅客逼爆。

好多人以為日本每間藥妝店（圖）價錢差唔多，去到心齋橋就狂買，無諗過要格價，費清最近完成京阪神之旅，發現同喺藥妝店，心齋橋就最貴，行遠啲去到堀江嘅橫街（附近有潮人購物區Orange street同麵店一風堂），重有零星嘅藥妝店，即刻「平幾百円」，以一些港客熱門購買的傷風感冒藥為例，特價後可平約200至300円，少數化長計，若買10盒8盒，隨時平幾千円，而且心齋橋嘅舖頭太多人搶貨，好多熱門產品都斷貨，或有「限購令」。
除咗堀江外，神戶同京都嘅藥妝店都平過心齋橋，如果有時間去神戶、京都行街，可以留番喺嗰度買，唔單止平啲，貨都齊好多。
藥妝店設有免稅專櫃，不過因為手續煩複，又要填表，又要將貨品放落透明袋封存，又要將表格同單據釘落護照，如果夜晚最旺場時段，心齋橋一帶舖頭隨時要等一個、半個鐘，唔想等，都係嗰句：遠離心齋橋。