走過漫天玫瑰花瓣，愛情之路，是甜也是「痛」。歌星周杰倫月前迎娶昆凌，接受訪問時深情剖白，提起某次強直性脊椎炎發作，身體痛到不行，最脆弱時，想起女方默默伴在身邊，下定決心互定終身。同樣患病的李國光，就說自己的愛情剛好相反，「大歌星因與女友共患難，覺得娶得過，我老婆就慘啲，結婚第一年，生下大仔我先發病」，可幸，太太沒埋怨「貨不對版」，還以行動見證患難愛情，不離更不棄。

記者呂麗嬋攝影陳奕釗

李國光與潘慧敏，有點似歡喜冤家。相約在80年代約會勝地的尖沙咀五枝旗捍，甫見面，互相「腰潤」的獨特相處方式表露無遺，「你問佢啱嘞，佢最好記性，千祈唔好得罪佢」、「係囉，你最好唔好俾我捉住痛腳」。中四認識，拍拖5年，22歲結婚。20出頭，已認定這個她，「我就係鍾意佢個人夠爽，咩都笑一餐，患病無人想，但我從無問點解，知道問都無用，既然逃避唔到，不如笑住面對」。

可幸，有人陪著他「笑住痛」，「感覺自己不似病人」，好多了，「老實講，我覺得我老公叻過周杰倫，痛咗咁多年無埋怨過一句」。收起笑容，潘慧敏舉起大姆指，一臉認真。90年代，強直炎還未被廣泛認知，結婚不久，李國光的腰脊，在豪無預兆下疼痛難當，「好似突然俾個鈎扯住，痛到行唔到，嗰時住觀塘，喺中環返工，正常人行條石板街10分鐘唔駛，我行足1個鐘，痛到標晒冷汗」。

「唔好話小朋友出世佢抱唔到，連唔小心掂到佢，佢都會痛到大叫」。李太說。面對無名病痛，惶恐不安，看遍脊醫中醫推拿骨科醫生，病情一直未見好轉，晚上痛醒，又試過痛到要坐輪椅，拖拉7年，直至脊骨彎曲，才被確診免疫系統出問題，「依家先叫多咗人知，我一直好好想分享經驗俾其他人知，等佢哋及早對症下藥，唔駛好似我咁，連累埋太太一齊受苦」。總說，愛情是一個願打一個願捱，但套用在小倆口身上，卻甜如蜜，信不信由你。