江若琳(Elanne)今個月初完成兩場入行十周年演唱會後，近日就孖男友生煎包王子蕭潤邦(Oscar)即飛去外地叉電，呢幾日佢都不斷喺IG po相，有美食相，有望住大海放空嘅相。

不過對住一望無際嘅大海同陽光燦爛嘅晴空，睇嚟睇去，始終都係爭咁樣嘢……好彩今日Elanne就貼咗張久違咗嘅三點式，感恩，不過希望下次Elanne可以close up啲啲……《蘋果》今日問佢同男友去邊玩？Elanne話：「哈哈，去咗泰國玩呀！」記者笑佢激罕着泳衣騷身材，佢就話早年出寫真集都有着泳衣。講到佢張相有啲生硬，佢就笑言：「好驚呀大佬，好大勇氣先貼張相出嚟。」

而Oscar亦喺ig貼咗一啲相，見佢離遠咁影住女友喺泳池度自拍，佢留言話：「她已經自拍了一小時有多！又唔食嘢！而且臂力很好，唔怪知人人叫佢女漢子啦」。