由一班股評人組成嘅香港股票分析師協會，搞咗個「上市公司年度大獎」，今年已經係第二年。噚晚協會就專登搞咗個晚宴，除咗公佈得獎名單，仲順手頒埋獎畀20間上市公司，表揚佢哋過去一年傑出嘅表現，同埋以高透明度營運喎。
呢廿間財演最愛嘅上市公司，除咗有長實（001）同煤氣（003）呢類實至名歸嘅大藍籌外，連細細粒熱炒嘅中盛資源（2623）同8字頭嘅匯財（8018），都有份上榜，兩隻股仔今年以嚟分別升咗124%同254%，果然係財演最愛嘅股份。

卓悅今年跌三成入選

由鄧聲興做會長嘅協會就話，挑選呢20間公司唔係睇佢市值大定細，都唔係睇佢股價表現好定壞，最緊要係透明度高，會同本地分析師多做溝通云云。之但係名單上，一啲低調到幾乎冇人識嘅國藏（559）、德普科技（3823）都入選，今年跌咗三成嘅卓悅（653）都有份，唔通係另類表現傑出公司？

欣賞華創高層肯企出來

鄧聲興仲話，就算公司高層大地震，只要公司好願意企出嚟同大家講解新領導嘅未來發展方向，佢哋都好欣賞。唔怪得人事變動多多、今年累跌37%嘅華創（291）都可以榜上有名啦。華華覺得，應該頒個「最高透明度大獎」畀華創啦！
對比返舊年名單，今年有8間公司上年都有得獎，例如係幫唔少上市公司做公關嘅皓天（1260）同TCL通訊（2618），相信佢哋同一班財演應該溝通得好緊密。
滬港通之後，突然多咗咁多隻內地股要分析，副會長郭思治（郭Sir）話，最大嘅困難，唔係分析間公司或者因為制度、習慣唔同而攞唔齊數據，而係「要學睇簡體字」同學普通話！一班股評人做開香港市場，郭Sir話佢要用多一倍時間嚟刨書！郭Sir一講，身邊個個有份量嘅股評人都點晒頭好同意，睇嚟份工更加難打啦！

李華華
mailto:[email protected]