好耐冇見電腦J，佢話要帶左丁山去銅鑼灣食「私房菜」，走出地鐵站崇光出口，行上唐樓，嘩，樓梯破落，似唔似食肆所在地呀；好耐冇試過步行上四樓囉喎，未免有啲索氣。電腦J講：「食飯前有少量運動，夠健康呀，你成日出入中環食店，電梯到步，試吓銅鑼灣新潮流，見識吓啦！」
見識吓都好，起碼知道市場趨勢。呢間食店嘅水準甚高，只得二十幾張櫈，好容易客滿，聽講亦經常客滿，不過左丁山啲中環朋友大概唔習慣呢啲環境，久唔久來一次就會嘅。

食完飯，行番四層樓梯落樓，入到地鐵站，碰到大編輯，原來佢是日放假，嚟銅鑼灣行街，佢話香港地好難搵到一碗靚麵，與在東京到處可以食到美味拉麵嘅情況，相差甚遠。日本拉麵之要害在嗰碗湯底，蔡瀾可以講三日三夜，肥仔K住在東京，買咗幾本不同版本嘅《東京都拉麵全攻略》，晚上若見到學生宿舍飯堂嘅菜式唔啱口味（機率超過一半，全世界嘅大學dormfood都唔會好得去邊），就與同學去食拉麵，逐區攻陷，已經食勻新宿、池袋、原宿，正在進攻涉谷，左丁山對肥仔K講：「咪一味掛住食，最好逐間做埋筆記，寫低啲優劣點，與全攻略互相對照。將來可以有兩個用途，一係師法蔡瀾，寫番本《東京拉麵秘笈》，第二就係與名店拉好關係，希望可以用特許經營權方法，將名店拉麵引入香港，話唔定可以成為個人事業。肥仔K只係答番一句：「我周身冇蚊，試問返到香港，邊個打本畀我開辦拉麵店？」左丁山為之語塞，如果佢老竇可以係咁意就畀二三百萬佢開店，當然乜問題都可以解決啦！
大編輯提醒，日本百貨店內有好貴嘅日本麵條，四十幾蚊一包，保證好食，鍾意食麵嘅，不妨一試喎！