MP3機嘅人通常都有一個共同問題，就係成日嫌記憶體不足，最近NEC出咗一部叫DCube嘅MP3機，絕對係賣大包之作。首先佢內置有128MB記憶體，閒閒哋都可以播到近兩個鐘，如果聽到悶悶哋，佢重有MP3機中罕見嘅收音機功能；另外，喺工作上，佢嘅數碼錄音功能一樣可以在商務會議上幫到手，再加上佢嘅超輕細機身，DCube絕對係史上最強嘅MP3機。
記者：馮彥彰
攝影：陳偉強

基本功能似足MD機
MP3功能方面，整體上嚟講，全機各項內置功能都做得好體貼。DCube擁有類似MD機嘅Group功能，亦即係可以將MP3音樂分Folder存入機內，唔怕錄了四、五十首歌之後好難搵（以128MB內置記憶體作計算），而且DCube重支援多樣播放功能，例如單曲重播、全部重播及音場選擇等，所以在使用上，大家可以完全當佢係部MD機咁用。

5秒唔使有歌聽
如果有用開SONY嘅朋友都會發現，每次下載歌曲至機中都要先轉換格式，花費不少時間。但呢部DCube就用上專有嘅《JetAudio》軟件，呢套軟件方便之處，係可以直接將MP3或音樂CD上嘅歌曲，傳送至DCube內（毋須經過任何轉檔程序）。由於接駁介面採用USB嘅關係，所以歌曲傳送亦甚快速，平均每5秒就可以過一首歌（MP3格式），真係話咁快就有歌聽。

錄音兼聽電台
另外，DCube還內置有收音機及數碼錄音等功能，喺收音機方面，DCube可以完全對應香港所有AM/FM電台頻道，而且還配置有12個電台頻道記憶功能，所以聽起上嚟，感覺零舍就手。至於數碼錄音方面，DCube可以作9.5小時數碼錄音，而且每段錄音都可以作分組處理，以後要聽番都十分方便。

「擰擰掣」操控夠方便
驟眼望落呢部DCube，相信唔少人都會被佢嘅超靚外形所吸引，銀色外殼嘅仿金屬機身，感覺極盡高貴，而且有街客見到呢部機時，覺得佢有MP3機中嘅8850之感！
至於內涵方面，絕對係MP3機中「賣大包」之作，首先佢罕有地內置有128MB記憶體（不設外置插槽），播MP3閒閒哋都會以近兩個鐘，而且佢重配置有收音機同數碼錄音功能，相對現時市面一般MP3機，功能絕對超幾班。
至於操控方面，以往一般MP3機都會被人詬病使用介面太繁複，但呢部DCube好似有心針對呢點，所以機身左右兩邊配置有兩個類似JogDail嘅擰擰掣，一個負責控制主功能目錄（MP3機、收音機及數碼錄音），而另一個則主責選曲（或選台），功能大分家，咁用起上嚟梗係方便就手好多啦！

記者意見：功能無敵惟欠耳筒遙控
DCube雖然機身超細，但在音色表現上也算稱職，加上極酷外形同集多功能於一身，絕對是近日最出色嘅MP3機。而缺點方面，相信只有一樣，就係耳筒上並未附設有遙控功能，如果搭車聽歌，真係會覺得幾唔方便。

NECMI-R930DCube產品資料
重量：40g（不包括電池）
尺寸：83.8×35.9×16.1mm
內置記憶體：128MB

售賣點：華仁會
電話：28682885