立法會選舉塵埃落定，4個新任議員將會喺下周三嘅大會上按《宣誓及聲明條例》宣誓。立法會今日就為新丁們安排簡介會，俾佢哋模擬一下宣誓情況以防到時有咩甩轆。不過，4人之中得3個現身，究竟邊個無出現？原來就係建築、規劃、園境及測量界謝偉銓，唔知謝偉銓係唔係覺得自己做過議員，所以唔使迎新呢？

今日立法會為新任議員安排迎新，上晝就係民建聯鄭泳舜，下晝就係區軒同咖喱飯一齊上堂，至於謝偉銓據了解係因為身在海外無出現。

八方留意到，區軒同咖喱飯都非常認真聽書，到模擬宣誓時佢哋更加非常認真，由頭到尾讀一次誓言內容，區軒更加按秘書處要求，由主席台前行返自己坐位，再由坐位行出主席台前宣誓，模擬整個情況。佢地之後又學點用投票系統，以免之後甩轆投錯票。

區軒之後同八方講，當選立法會議員對佢都係如履薄冰，加上未宣誓建制派已經大力打壓，佢都唔可以有任何出錯，所以都好認真聽書。佢又話未來會用被DQ嘅羅冠聰之前用嘅901房，「重奪議會由重奪901開始」。至於前議員咖喱飯就話，參與迎新係要溫故知新，了解立會改咗議事規則後嘅分別喎。

身兼全國政協委員嘅謝偉銓回應指，12日即係選舉後翌日，上午去咗北角政府合署同一間建築顧問公司謝票後，急急趕往北京開政協會議，今晚（15日）啱啱先返到香港，咁又難怪出席唔到立會迎新活動咯。