鍾嘉欣之前就拋低老公Jeremy，帶埋囡囡Kelly返香港賺錢錢，但時間過得好快，嘉欣BB同Kelly已經返咗加拿大，準備一家三口過聖誕之餘，今日仲有周刊報道話嘉欣BB返加後，亦要準備陪「處女黨」嘅好姊妹岑麗香出嫁。

上月尾，嘉欣BB就帶住3個多月大嘅囡囡Kelly返香港出席活動( 新聞連結： http://bit.ly/2gY6Oyl )，期間佢就爭取時間，相約好多香港嘅朋友見面，好似楊怡、馬浚偉、張嘉兒、胡杏兒，當然唔少得佢嘅「處女黨」好姊妹王君馨同苟芸慧啦！

時間過得好快，嘉欣BB日前就同媽媽帶住Kelly飛返加拿大，報道就話到嘉欣好慳家，帶住囡囡都要坐經濟客位，但《蘋果》據嘉欣BB身邊嘅友人透露，其實嘉欣BB當日係坐商務客位㗎。

報道嘅知情人士仲話，原本嘉欣係想約埋苟姑娘一齊飛返加拿大，幫另一好姊妹岑麗香籌備婚禮，但嘉欣就擔心帶住Kelly同媽咪，又唔想過份高調，所以最後都打消咗念頭，自己先行帶囡囡同媽咪返加拿大先。