噚日政圈最多人講嘅話題，就係原本悶到hihi嘅全國政協會議，竟然有個「奇人」以作狀到爆嘅朗誦方式發言，有關發言嘅新聞片喺網上瘋傳，個個睇完打冷震之餘，仲基於「不能只有我看到」四圍分享，令「中招」政圈人士數量大增。呢個自稱「平凡的台灣女孩」嘅「奇人」，就係台籍港區全國政協委員凌友詩，有政圈好事之徒同八方講，呢個凌友詩來頭唔簡單，江湖流傳就係因為佢，令前中央政策組首席顧問劉兆佳，嬲咗佢嘅接任人邵善波。

港大政治博士

前日凌友詩作狀到爆嘅朗誦式發言大講「祖國也必然統一」，獲台上台下政協委員多次拍掌支持，但香港人就唔受落，有網民話點睇佢都只係一個「大媽」！但其實欣賞凌友詩嘅又點只班政協，佢2003年攞到香港大學政治哲學博士學位後，2005年入咗現時已被特首林鄭月娥解散嘅中央政策組做高級研究主任。有政圈好事之徒同八方講，凌友詩係由當時嘅中策組首席顧問劉兆佳聘請入去，而劉兆佳亦好睇好佢，直情當佢係愛將，全力捧佢上位。

直到2012年曾蔭權離任特首，689頂上，劉兆佳因為唔係689自己友，自然冇得留低，當年689就搵佢愛將邵善波做中策組首席顧問，政圈好事之徒話當年有傳劉兆佳向邵善波推薦凌友詩，但邵善波似乎唔多識欣賞，不久之後凌友詩就離開中策組，當時有傳聞話係邵踢佢走，聽聞劉兆佳對呢件事好唔高興，仲有傳佢嬲咗邵善波，不過劉兆佳見到愛將今次咁出位咁受歡迎，應該好開心喇！

李八方