坐擁逾千億財富、名列香港十大富豪之一嘅劉鑾雄（大劉），並唔係含住金鎖匙出世，一樣有捱過，到佢發跡，食好嘅住好嘅，好多人都以為佢營養比人好，養生自然冇難度。

不過，大劉喺今年接受《蘋果》專訪時透露，早喺24歲嗰年，已經要接受割膽手術（新聞連結： http://bit.ly/2ngVqNq ），到近年患有心臟病及糖尿病等多種病症，今年年屆66歲嘅佢，亦都開始關注養生之道，佢話自己有做運動，已經唔使再用枴杖借力助行，中氣又好咗，佢更改變生活習慣，o依家睇完晚上11點半新聞就瞓，第二朝7點半至8點左右起身，然後返華置開工，一改以往夜鬼嘅生活習慣。

另一方面，以往愛到福臨門開餐嘅大劉，自患糖尿病後，口味變得清淡，菜式少六成鹹度、少七成糖份，更轉場到半島嘉麟樓、中環唐人館外，又將福臨門廚師「私有化」，聘請做家廚。愛食甜品嘅大劉，亦獲佢會幫襯嘅Zoe西餅特別為佢調配減糖口味，但其實大劉已為因為糖尿病而戒食。（新聞連結： http://bit.ly/2x7U5Ce ）

而大劉o依家會以健康為先，每日最少抽一次血，監察自己身體狀況，喺家中又會安排傭人24小時看護自己。另外，大劉非常注重衞生，佢坦言鍾意乾淨，亦經常洗手。