李蘊嫁夫隨夫，同老公羅章冠，仲有1歲囡囡羅紫晞喺廣州生活，一家三口樂融融，李蘊係母乳媽咪，所以母女要寸步不離。有護膚品廣告商近日力邀靚媽李蘊代言，佢要求先做「白老鼠」試咗產品先決定，李蘊今日接受《蘋果》訪問時話：「我次次要試過先接廣告，如果唔係，人哋用咗有問題我有責任。」

李蘊扑錘做代言，廣告商都好體貼，全部移船就磡，特別安排拍攝團隊返廣州，方便李蘊湊女，所以拍攝嗰日，李蘊就隨身帶埋奶B羅紫晞去開工，佢話：「以前拍6個鐘，快快拍完，o依家我仲餵緊人奶，我要帶埋囡囡去開工，拍攝時我唔可以走開，但換衫時，我就暱埋喺更衣室餵奶，今次咁樣開工，感覺好新鮮，好多謝團隊咁遷就我，感恩大家對我好好。」

紫晞識得對鏡笑，好有潛質入行，問到李蘊將來會唔會畀囡囡入行？佢話梗係女大女世界：「我冇得話事，佢鍾意讀邊科、鍾意入邊行，我會畀佢多啲自由，由佢自己選擇囉，唔係我想佢點就點，我都唔係話好想佢入行，但囡囡都鍾意唱歌跳舞，佢啱啱學行，但一聽音樂自然跳舞，我叫佢唱歌，佢又會唱，可能有啲天份，點都要睇佢將來興趣，睇佢想讀邊科，先決定做邊行。」