韓星今年認真忙,除了要出席韓國當地各大電視台嘅頒獎禮外,又要出外搵真銀,除咗SE7EN、李玹雨等嚟咗香港搵銀外,其他韓星亦都有撲到內地搵人仔,當中天團BIGBANG因為冇留喺韓國出席頒獎禮而被人指摘,不過都無損佢哋噚晚現身湖南衛視跨年晚會嘅心情,佢哋噚晚喺台上落力表演,令全場high爆。
而BIGBANG平日開騷可謂一票難求,所以佢哋噚晚現身跨年晚會時,唔少內地藝人、港星都爭取機會欣賞佢哋嘅演出,好似內地人氣青少年偶像組合團體TFBOYS就趁機會同BIGBANG影合照,而有網民就話喺台下突然見到港星陳偉霆一支箭飛去台下,網民鏡頭成功捕捉到陳偉霆施展佢嘅瞬間轉移嘅功夫,之後陳偉霆原來就孖內地演員李易峰齊齊坐喺台下地上睇BIGBANG嘅表演。
另外,除咗BIGBANG外,女團f(x)都有現身CCTV嘅跨年元旦晚會,而韓劇《奇皇后》男星池昌旭亦都去咗江蘇衛視嘅2016跨年演唱會,佢仲有喺台上獻唱中韓版《星晴》。