容祖兒將於年底舉行「1314容祖兒演唱會」，今次亦係祖兒第七次喺紅館開騷，祖兒會喺今年12月21至28、31，以及明年1月1日舉行共10場個唱。

祖兒今日出席演唱會記招，佢坐喺睡床出場，喻意會瞓身演出。英皇高層吳雨為祖兒送上金豬頸鏈，祝佢好生養，再開多加場，同時又為祖兒送上1314枝玫瑰花祝賀。

講到歷年只有具樂壇地位歌手，先攞到紅館除夕跨年檔期，祖兒坦言心情興奮，佢話：「得到呢個檔期，心情好似出嫁咁，今年可以踩住紅館舞台倒數，係我事業嘅里程碑，搞到我兩晚失眠。」

講到1月1日元旦演出提早喺傍晚六點半開騷，目的係要遷就祖兒完騷後出席樂壇頒獎禮，祖身就話：「對我嚟講係習慣，都參與吓。」