最後合照，又話已分埋手，Ruby(劉依靜)都唔係第一次講同周永恒分手，奈何每次都掟煲唔掟蓋，早前暗示忍夠周永恒提出分手，點知上個月又被影到佢同周永恒喺深圳公園傾偈，仲上埋周永恒喺內地寓所過夜。Ruby早排介入周永恒同趙頌茹嘅婚姻，更由第三者變「正印」，形象插水!

今日又有周刊指，Ruby向佢哋大爆周永恒嘅嘢，唔通反轉豬肚就係乜!Ruby喺訪問中，聲稱同周永恒分咗手兩個月，爆周永恒攞佢嚟做出氣袋，對佢無理取鬧，又話自己借咗唔少錢畀周永恒去讀健身課程，Ruby又稱因為早前誤傳佢同周永恒嘅情慾片，而曾患驚恐症，覺得好大壓力，成個人瞓唔到，揚言唔想再聯絡周永恒，暫時對恒都唔再做朋友，Ruby更斬釘截鐵咁話，如果同周永恒講嘢，會令自己諗番啲唔好嘅回憶。

Ruby喺報道稱承認係第三者，同周永恒拍咗拖成年，兩個月前先分手，問及上月被影到佢夜會周永恒，佢就話目前真係冇聯絡，當時佢哋係上朋友屋企，嗰度唔係周永恒屋企，Ruby又話同周永恒分手係因為小事積埋，覺得對方情緒好唔穩定，成日對佢發脾氣，試過有次佢哋一齊去買餸，點知Ruby買唔到菜，就畀周永恒鬧，覺得自己同周永恒一齊，係自己照顧男方多啲，反而，o依家想要一個穩定嘅男友。