最近努力減肥嘅陳奐仁（Hanjin）同蔡思貝，今日喺尖沙嘴出席護膚品牌活動，講到佢減肥是否達到最理想磅數？他表示仲未，要繼續操，最想回到16歲時嘅健康狀態，佢話︰「嗰時大約66 kg，依家有68kg，愈接近就愈難。」依家佢仍有輕微嘅脂肪肝，問佢使唔使加操？佢話︰「覺得最近over咗，肌肉有啲痛，回復嘅速度唔夠快，想hold住先。」

問到Hanjin如果減到66kg會唔會出寫真？佢即時大笑，記者就提議佢着白色三角泳褲，佢話︰「白色透明喎，你哋真係好咸，但我都會畀心機考慮下呢個意見，不過身材同顏值，好過我嘅人好多，我哋呢啲要靠後天護膚同操肌。」講到操到有腹肌，佢話︰「腹肌係有嘅，但未係大家睇慣嗰種，唔想用影相技巧搭夠，希望大家可以被我鼓勵到，一齊有個健康身體。」

而蔡思貝今日著咗一件露肩衫襯短褲，問點解唔著廣告相上嘅露腰運動裝？佢笑話：「我都露膊頭啦，嗰啲睇相睇片得就得。」問到用得多唔多錢喺護膚上？佢話﹕「應使則使，最誇張一次買幾萬蚊facial package，平時都好慳，好少買物質嘢。」現場佢同陳煥仁一齊拉肋，蔡思貝笑笑口話：「好想揭起睇佢(陳奐仁)啲腹肌。」陳奐仁拒絕後話：「剩係你想睇咋，鹹濕妹！」

精選娛聞，喺晒《娛果》
http://fb.com/appledailyent