前女子組合Freeze成員陳樂榣（Alley）喺2012年嫁畀做生意嘅圈外男友方先生（Donald），閒時教人畫畫同喺網上賣韓國品牌首飾。今年5月，Alley低調生咗囡囡Aria，肥肥白白好得意！
Alley噚日喺電話透露囡囡出世時重7磅，𠵱家有女萬事足嘅佢話：「Aria英文名同我英文名一樣用A字，初初出世時似晒老公，心諗我生得你咁辛苦，少少都唔似我，有啲唔開心。好彩囡囡眼仔越嚟越大，似番我多啲。」Alley話𠵱家餵人奶：「希望餵到一歲，除咗對BB健康好，仲係一個親子時間。」Alley話暫時唔諗追仔，佢話：「𠵱家要花好多精神同時間畀囡囡，有人話5個月大已經要報playgroup，但我同老公都覺得唔一定要讀名校，最緊要開心。」

自覺係怪獸家長

不過，Alley都覺得自己係怪獸家長：「全屋長輩，得佢一個小朋友。除咗爺爺嫲嫲，仲有婆婆同兩個姑媽錫，佢要人抱住先肯瞓，我同老公都要互相提醒唔好太縱佢。」問老公有冇送大禮獎勵？Alley冧爆話：「佢成日叫我睇啱乜嘢就買，但做咗人阿媽，乜嘢都個女行先，自己唔捨得買，淨係買畀個女，最鍾意買頭飾，幫佢扮靚影靚相留為紀念。」
撰文：馮仁昭