房屋協會舊年推出第一個長者屋，將軍澳樂頤居，反應唔錯，事隔一年，推出牛頭角彩頤居，交通及社區設施同樣齊全。今次重有唔少新猷。
房協高級經理許鴻傑話，彩頤居單位內設叫護鐘系統，住戶有事㩒掣，可以同控制室護理員通話，咁就可以放心，知道一定有人嚟協助啦！
好受歡迎嘅室內暖水泳池梗唔少得，有十二米半長，深僅米半，唔怕浸親。
房協又搵嚟聖公會福利協會，提供護理服務，包括物理治療、職業治療、中西醫、牙醫及美容，又有不同嘅興趣班，同圖書館，總之，住喺度不愁寂寞。

仲記待慢老記
淺水灣GrosvenorPlace，貴為每個單位市值超過半億嘅豪宅，物業管理服務，認真有待改善。
淨係call的士，咁簡單嘅服務都做唔到，你話日後點樣服務啲尊貴住客呢？
蘭西噚日去GrosvenorPlace，出席記者招待會，由於代理第一太平，並無安排車輛接送記者，私家路上，又鮮有的士駛過，於是叫管理公司仲量聯行幫手call的士。
點知擾攘咗半個鐘，結果都係冇車到，原因不明。白白呆等半個鐘嘅記者們，最終徒步落山，先至截到的士，趕返報館寫稿。