協助農行（1288）前年上市嘅副行長潘功勝，傳聞話好快會棄商從官。內地「財新網」噚日引述消息人士話，呢位未滿50歲嘅賓架才俊，成為人行副行長大熱。若果消息屬實，身兼農行執行董事嘅潘功勝，將會繼中行（3988）前副行長朱民後，另一位由商業銀行晉身人行副行長嘅內銀高層。
先後任職工行董事會秘書同埋農行高層嘅潘功勝，乃係農行A+H股上市嘅功臣，香港跑開內銀嘅記者對佢亦相當熟悉，特別因為上市身體操勞，搞到佢兩鬢添上不少銀絲，加上親切嘅笑容，令記者印象深刻。潘董早前去咗美國哈佛短期進修，3月底嚟香港主持農行業績記招時，仲專登轉台用英文發言㖭。

人行前紀委書記王洪章舊年底調任建行（939）董事長，原副行長馬德倫又適齡卸任，人行副行長一職出現空缺，於是人行上星期重新啟動相關人選考察程序。華華心諗，內地有唔少出色賓架，人行都係時候加入新血。