當年今日
關於我們

【「唔好扮可憐啦」之後…】 江若琳傳患抑鬱林小明:叫土豪俾錢解約

蘋果日報 2014/04/24 06:00

林小明江若琳抑鬱解約土豪

寰宇老闆林小明近日同旗下藝人江若琳,因解約問題而鬧出風波。江若琳哭訴奉獻咗十年青春,一直白做:「一毫子收入都未分過」,仲要公司墊支。依家解約求去,但林小明唔肯放人,日前出席杜琪峯生日派對,有傳媒提到江若琳哭訴一事,林小明就話:「哭訴?唔好扮可憐啦﹗」似是冇彎轉。

近日江若琳個婆婆入院,令江若琳更感百上加斤,前日於網上寫道:「在我過去的二十六年裡,路,一點也不平坦,再顛簸、再崎嶇的路,縱然弄得傷痕累累,我還是繼續奮力的走下去,但今天,對我來說一切都不重要了,即使前面再風光明媚、再天朗氣清......如果可以,我但願用盡我畢生的運氣,去換取你的健康、平安。」今日就有報道指江若琳因為合約問題,加上家事煩心,因而爆抑鬱。

根據報道中指,自認分文收入都未收過嘅江若琳,唔止連蛋糕錢都要自俾,就連電影換票證,原來都係江若琳自己扲荷包。報道話07年佢要宣傳新片《嚇死你》,當時問老闆攞咗20張換票證,第二日公司就有人好快手俾咗啲飛,連帶嗰廿張飛嘅價值同印刷費嘅收據都俾埋江若琳。報道指嗰度夾埋大約千零蚊左右。真係一個仙都計得好清楚。

至於雙方最大分歧,係去年江若琳要求加人工,當時公司一直抽開佢六成佣,江若琳上年問老闆可否少過五成,老闆應承咗,但到簽約一刻,江若琳發現條款根本冇變,於是向老闆問明白,據報道就話當時老闆回應係「飲醉酒,冇講過。」

如今倒欠公司150萬嘅江若琳,進退兩難,求解約又不成,舊債未清,新數又嚟,苦無對策,令江若琳患上抑鬱症,要食藥鎮定情緒。據報道引述知情人士指,江若琳已經搵律師處理解約事宜,如果應付唔到律師費,江若琳考慮賣咗屋企人買落,依家自己住緊嘅北角樓應急。

該報道亦有問林小明回應,佢就話唔知道江若琳傳患抑鬱一事。至於會否同意解約?林小明就話:「無啦啦我做乜要解約?要解約咪傾囉,仲有五年,咪計數囉。我要維護合約精神。」

之前有報道話過,江若琳北上搵到個土豪支持同獻計,令佢決心離開公司解約求去。問林小明有冇聽過?佢就話:「如果真係有,叫土豪俾錢解約,我anytimeopen傾。我仍然幫佢接job,係佢唔聽電話。」