兩大免費電視台ViuTV及無綫於上周一（2號）晚上9點半，齊推出越劇集《二月廿九》及中國製作的穿越劇《慶餘年》打對台。雖然《慶》劇收視因疫情得益，但討論程度遠不及《二》劇，靚人靚景加上緊湊劇情，連大台視后田蕊妮都畀「五個好」，說自己睇到喊。

故事圍繞在2月29日出生的Yeesa（吳海昕飾）在2017年慶祝生日後穿越至2020年2月29日的日本北海道。10集的劇情已經播到一半，據悉今晚播出的第6集，會解開其中一個謎團，就是Yeesa的閨密Fiona（李敏飾）是否會死？上周五播出的第5集，劇情說到2018年的Yeesa再次穿越到2020年2月29日，意外預知Fiona因子宮頸癌離世，令她大受打擊。Yeesa回到現實後將事情告知懷孕中的Fiona及她的丈夫Johnathan（柯煒林飾），Johnathan寧願選擇太太也不要BB，真情告白，讓不少觀眾感動落淚。而第6集，劇情會去到Fiona離世的一天，即9月2日，之後更會發展到去2018年12月25日的聖誕節，暖男Ryan會向Yeesa表白愛意。

觀眾除熱衷拆解Yeesa穿越之謎，亦好想知她最後會選擇暖男Ryan（徐天佑飾），還是Cool爆的余家聰（劉俊謙飾）。吳海昕在網上做了一個意向調查，頭5集結果有6成人選擇Ryan，4成人選家聰。

吳海昕昨日接受《蘋果》電話訪問時露口風講出自己心水之選：「我拍緊時成日同導演講，如果係我，我一定會揀余家聰，因為我本身年紀大過Yeesa，Yessa角色設定係24、5歲，但我就大佢幾年（30歲），所以我心境比女主角成熟啲，鍾意啲男仔會令到我成長。但抽身出嚟，以觀眾角度又會覺得天佑嗰種係絕種好男仔，如果唔珍惜就對自己唔好，我都好掙扎。」海昕拍劇時也吃了不少苦頭：「因為我每次穿越都係俾人捉，有警察、日本人，有次仲跣低咗拗柴，係身體上嘅苦。同埋我要學日文，第6集之後要講自己去調查一啲案件，我同導演都有學到，為劇集付出好多。」問她最後能否改變命運？她說：「我覺得人永遠都係逆境自強，最重要無論發生咩事都要忠於自己嘅決擇，對得住自己唔好令到人生後悔。」

天佑則說：「Yeesa最後揀邊個就唔劇透啦，留待劇情發展。」對於獲逾半數網民支持，天佑表示：「我都想我嘅角色Ryan成功，咁真係要多謝大家先啦！今次部劇收到好多好嘅評語，製作團隊都好開心。」是否有信心贏大台膠劇？天佑說：「無謂比較，我哋一班年輕有熱誠嘅團隊想拍一套好劇，觀眾自然會識睇。」

-----------------------------
第三屆最港電影大獎
按此立即投票
-----------------------------
【武漢肺炎】專頁
全民自救 抗疫資訊盡在《蘋果》