當年今日
關於我們

陶喆狂發微博轟航空公司 網民話幼稚

蘋果日報 2012/11/26 06:00

飛機陶喆

43歲嘅陶喆,日前喺微博開火,點知發洩完之後輪到俾fans鬧爆。話說佢日前由香港搭機去成都開會,去機場check-in時,先知班機會延誤半個鐘,於是佢去咗候機室等,但遲遲等唔到通知,於是就等啦。

冇諗到後來航空公司突然又話俾陶喆知,更改登機閘口,陶喆話當時根本冇宣佈開始登機,亦冇聽到登機廣播嗌佢個名,但對方堅稱話有。當陶喆趕到時,客機已飛。陶喆嬲爆寫道﹕「就算我沒有聽到登機廣播,那至少他們候機室的人員可以來叫我吧?我去了櫃台不只一次而兩次,所以他們不可能沒有看到我這個乘客!」

結果陶喆嬲到喺微博連發六篇文,怒斥航空公司工作人員回覆態度不佳、唔夠盡責,以及要求賠償。鬧就鬧夠喇,微博上網民反應兩極,有人話該航空公司唔係第一次係咁,好多人都力撐佢;但都有唔少人寸番陶喆轉頭,例如﹕「你的行為都不像一個43歲的中年人會做的事情,很幼稚!」、「你算是個甚麼,非得別人特殊對待?」、「那為甚麼其他人都趕上飛機了?」仲有好多都鬧得幾狠吓。

網民鬧得陶喆咁狠,好大可能係因為佢一口氣發咗六條微博。