呢幾句鏗鏘有力嘅說話，唔係鄧光榮喺紅館講嘅，應該係喺人民大會堂講先啱數。一年一度政協、人大兩會噚日喺人民大會堂開鑼，呢個商議國家大事場合，今年卻變成八卦「郭家大事」大笪地，官商政要表面睇官方文件，聽領導人訓話，私下卻議論紛紛兒女私情，打聽郭家大事如何收科。

八方早前建議國家介入調停郭家大事，事關「以心建家」嘅郭家一旦唔同心，隨時成為反面教材，輕則損害新地金漆招牌拖累全港樓價，重則影響建構和諧社會，妨礙國家從全局出發，全面建設小康社會嘅重大戰略任務，真係可大可小唔講得笑，感謝領導人接納八方意見，「休假」嘅郭炳湘終於獲國家指示，噚日以政協常委身份現身人民大會堂，出席全國政協會議開幕禮，有領導人「關心」，相信郭家大事好快就平息。
有政協、人大透露，以前郭炳湘上京開呢啲政治大會，多數會同IdaTong同行解悶，今年佢聽番阿媽話，有消息指佢同太太Wendy雙雙北上，噚日去人民大會堂開會，成為主席台上焦點。唔知係咪擔心全國政協主席賈慶林學鄧光榮，忽然要佢企出嚟表白，郭炳湘睇嚟有啲心不在焉，同早前喺ClubJJ's嗰晚一樣，好似心事重重咁。喺討論國家大事場合講郭家大事，除非湘仔有秋仔咁好功力，或者Wendy會好似欣宜幫老竇解圍咁護夫，否則大庭廣眾都好難落台。
前日話想做和事佬「輕輕勸吓佢」嘅賭王何鴻燊，噚日好無奈咁講，搵咗成日都唔見阿湘，但相信對方知道江山重要過美人，會聽老婆話，總之大事化小，阿湘短期內就會放完假坐番正，三兄弟再拍住上。八方認為賭王都係唔好打擾郭炳湘喇，一來賭王三妻四妾享受齊人之福，你同郭炳湘行埋，都唔知郭家大少奶鍾唔鍾意，二來人哋兩公婆可能正在指住「鳥巢」山盟海誓，望住「水立方」永結同心，阻住人哋喺北京過二人世界箍煲就唔好啦。

mailto:[email protected]