昨日港股開市後急跌，早市已經勁跌近500點，當時國內A股只係微跌，到下午A股跌幅擴大至超過4%之後，港股跌幅只係輕微加深。港股行先A股以至美股一步，跌得快過人已經唔係第一次。
跌市之中個別四五線股跌幅特別大，例如森源鈦礦（353），股價一度勁跌近4成，收市跌25%，成交有6000萬元，以一隻只得3億銀市值嘅股仔而言，成交算相當之大。此股昨早市曾升17%，之後掉頭勁插，由於昨日公司並無特別交易公佈或者消息，所以如此波動唔排除涉及斬倉事件或有人急於套現沽貨。

呢隻前稱旭日環球嘅股仔，最近見報嘅新聞包括去年全年勁蝕7913萬元、收購內蒙古礦山後有可能發換股債融資，以及大股東梁氏遭人入稟高院追討未清還貸款約628萬元等，全部係負面消息。
該公司上月初停牌，復牌後宣佈以代價9.61億元向大股東梁氏收購主要從事勘探小紅山鐵鈦釩礦的公司49%股權，透過發行可換股債券形式支付，換股價0.25元，如全數行使，則該公司將發行合共38.43億股，大股東持股量將由22.22%增至79.38%。
交易係典型上市公司購大股東私人資產，令大股東持股大增嘅模式，上市公司無集到資，資產詳情外人唔易了解。由於大股東有訴訟在身，財政問題曝光，可謂一大堆問題纏身，局外人不明就裏，切勿胡亂入市博反彈。假如陸續有股仔爆煲，或反映市場有人缺水，出現火燒連環船風險唔低，股仔短期還是不要沾手為妙。