老董出任主席的國慶籌委會，為慶祝中共建國68周年，最近豪擲1,200萬元製作費，畀著名藍絲導演高志森製作10月1日國慶文藝晚會同10月2日的國慶青年音樂會。高志森今日介紹呢兩個節目時話，今年青年音樂會最重皮，係邀請韓星INFINITE來港獻唱，「因為佢地唔只歌酬，仲有食、住、行呢！飛機票呢！」問到有乜港星獻唱，高志森就話有「坤哥」吳業坤，同佢諗咗一大輪都講唔出個名，最終要問助手先記得的女歌手林欣彤。

介紹完個音樂會，高志森就介紹以「實現中國夢」為題的文藝晚會，點知一開口已嚇親唔少人，皆因佢話:「晚會司儀係陳百強先生」，之後至更正話「唔係，係陳百祥先生」。高志森之後話當晚有9個環節，其中「我的祖國」環節，有佢口中「好資深的鄺美雲小姐」獻唱「我的祖國」、「甜蜜蜜」同「月亮代表我的心」三首歌，跟住就一班年齡介乎9至16歲的年輕人演唱西樂，其間有人表演耍太極，形容「成個活動有年輕人的活力」。至於高志森力SELL的重點環節，係中國人民解放軍駐港部隊文工團的「軍民同心」環節，話屆時會有人表演打鼓同跳舞，環節比上年長3分鐘。

電視轉播方面，舊年晚會有線電影二台、香港衛視同樂視都直播，今年就只剩返有線娛樂台喺當晚7點獨家直播，ViuTV則由舊年10月10月凌晨轉播，改成今年10月16日凌晨至轉播，相信反映到個晚會有幾吸引。