加度素自從執起AC米蘭教鞭之後，雖有畀弱旅賓尼雲圖迫和嘅劣績，但周日終於迎來佢執教第一場勝仗，憑著中場邦拿雲度拉梅開二度，主場2:1擊敗博洛尼亞。一路喺場邊超肉緊嘅加度素，就話自己係緊張大師，做乜都好緊張，就算同個仔踢波咁冇競爭性都會緊張，當然做米蘭主帥就刺激好多喇。

今仗加度素改踢433陣式，中場邦拿雲度拉表現出色，加度素大讚呢名28歲中場：「我覺得邦拿雲度拉係意大利國內其中一個最好嘅中場，佢可以打到中場唔同位置，有創造力而且識入波。不過，係體能上仍然有加強嘅地方，始終今季佢因傷休戰太耐。」

而同日意甲，拿玻里主場0:0和費倫天拿，羅馬作客都同基爾禾互交白卷，頭四名球隊都出現和波，形勢冇變，A米嘅同市死敵國際米蘭就繼續排喺榜首。

--------------------
球迷一定要知！英超一哥曼城，已經登陸​『BFB​』​！登入即送藍月球星： http://bit.ly/2AAiPDS