容祖兒《My secret live》演唱會喺灣仔演藝學院舉行14場，一眾圈中好友都有到場支持。而且今晚嘅舞台佈置到好似Joey間房，同觀眾有近距離接觸。今晚除咗會唱啲比較少聽到嘅Side Track歌之外，仲會同fans講啲「心底話」。

Joey同fans大談自己嘅擇偶條年，佢話：「我擇偶完全唔會睇外表，男朋友都唔會揀靚仔。」在場觀眾聽呢句都笑咗出聲，Joey即刻話：「唔好笑！唔鍾意靚仔唔代表鍾意醜樣！Average啦，反而鍾意啲有肉地，肉騰騰，淋淋地嗰啲。」在場有觀眾大嗌Eason，Joey聽到即刻話：「吓！佢？佢係below average喎！」Joey講完自己都忍唔住笑：「I ‘m sorry，因為呢個係secret garden，所以講嘢比較直。」

Joey講完笑就講番「有肉地」呢樣嘢，佢話：「有時覺得有肉地好可以，又好搣，又好攬，做最緊要開心。好似Wyman(黃偉文)咁，如果佢ok我，我都ok佢㗎！不過我緊係知道Wyman唔ok我啦。」

講完「肉地」，Joey就講番啲「正路」啲嘅條件，佢話：「喺我眼中冠軍嘅擇偶條件，就緊係有音樂才華嘅人啦！音樂對我嚟講係扣人心弦嘅事，好似今日音樂總監何炳咁，佢本身魅力都已經好唔錯。食飯嗰時係個靚仔，但一行埋去個琴度即刻升咗呢！」Joey仲話何炳用指尖彈琴鍵嘅一刻就足以令自己着迷，Joey講笑話：「所以我今日安排佢喺我後面彈，唔好俾我見到佢，如果唔係我就會『Oh My God』咁樣。」

講完擇偶條件後，Joey就分享一封佢13歲時寫嘅情信。工作人員就拎咗一封好破爛嘅AP Duck信出嚟，Joey就開始讀出嚟：「93年3月16號，Dear乜乜乜，我啲字係唔係好靚呢？呢張PC Duck嘅信紙係我專登買畀你，(Joey笑一笑話：「我o依家知點解佢同我分手。」)點解我會X你，因為你可愛得意，可唔可以再乖啲啊？你可唔可以回信畀我啊？你X唔X我啊？仲有三個月我生日，你可唔可以同我講生日快樂。」台下觀眾大叫，Joey即話：「X唔係你哋諗嘅意思，大家好奇怪點解封信會去返我度，因為分手之後佢畀返我，當時我好細膽，鍾意同愛字都唔敢講，十三歲到三十三歲，都唔係好敢講愛同鍾意，好彩我有好多歌可以表達。」