愛情魔力究竟有幾大？足以令一位大男人，結束國外輝煌事業，由瑞士回歸日本！講緊係日本國腳中場中田浩二，佢將於6月由瑞士巴素利，返回國內效力鹿島鹿角。
現年28歲嘅中田浩二，代表國家隊踢過兩屆世界盃，曾於98至04年效力鹿島鹿角，並帶領球隊勇奪兩屆日聯、一屆天皇盃及日聯盃冠軍。佢亦參加過悉尼奧運及99年世青盃決賽，大賽經驗豐富。
中田浩二同高原直泰、稻本潤一兩名國外搵食嘅球員係老友，故一直希望向外闖，終於喺05年得償所願，加盟法甲球會馬賽，當時教練正係前日本國家隊統帥杜斯亞。不過4個月後，杜斯亞被炒，中田浩二同球會關係轉趨惡劣，更拒絕加盟以色列球會耶路撒冷比達，事業因而陷入低潮。

直至06年1月，中田轉會瑞士巴素利，更轉型踢中堅，踏上事業另一高峯，佢憑出色表現帶領球隊兩奪聯賽冠軍，今屆更成為「雙料冠軍」得主。除咗巴素利希望同佢續約，多間德國及法國球會均作出斟介，不過佢千揀萬揀，最終都選擇加盟鹿角！何解？
中田解釋：「我年紀唔輕，如果過咗30歲先轉會，我驚到時水準會下降，所以真係好難抉擇！」他坦言回巢係因為深愛母會，其實佢只係講出其中一個理由，另一個更緊要嘅係乜？當然係日本紅星加藤愛啦！
據講中田計劃同加藤愛拉埋天窗。咁又係嘅，如果中田唔返日本搵食，感情又好難維繫喎。