以前《信報》有個專欄，名「原氏物語」，作者原復生。呢位原先生文筆唔係十分流暢，但每日寫一篇稿，用足功夫，內容十分充實，而且態度客觀，行家一睇就知有料到。中環財經人士日日睇原復生，個個想知道佢究竟係何方神聖，但《信報》嘅老友記都話唔知，話係老闆直接約稿嘅。好嘞，原復生寫到去年十二月中以後，突然封筆。究竟去咗邊呢？此日收到「原氏物語」第三集，內文竟然暴露作者身份。「原復生原名蔡東豪（TonyTsoi），一九六四年生，中學就讀香港華仁中學，畢業於加拿大西安大略商學院，現任職傳媒機構的管理層。」邊間傳媒呀。

經一番打探，公關靚女阿美回報，原復生去咗商業電台做COO，除咗何驥、俞琤之後就到佢，好高級。至於原來營運總裁(COO)鄭丹瑞就開新節目，改為創作總監，呢次擺陣都幾奇，原復生精於證券分析，幾次評論過電台電視台啲財經演員，以前未做過電子傳媒，點解會轉行呢？大概係俞琤慧眼識英雄，十分賞識原復生滿腹經綸之故。
都好嘅，媒體不妨久唔久就有新血注入，刺激舊人思維，帶入新風氣，令媒體不斷向前進步。商台之得，就係《信報》讀者之失，以後睇唔到原復生嘅過癮文章（如吳三桂引拿破崙入關，講HP與戴爾電腦競爭）。照計原生不如粉墨登場，開番個節目講股，等人知道真正分析員與財經演員之分別。