相隔5年再開騷，黎明（Leon）今次喺中環海濱長廊舉行嘅演唱會，除咗吸引香港樂迷唔介意高價門票照睇可也，亦都吸引咗好多外地歌迷飛嚟香港睇，之但係今次場地唔係大家熟悉嘅紅館，究竟要點樣去呢？《蘋果》記者今次幫大家睇過喇，大家如果坐公共交通工具呢，最近可以喺香港站A2出口行去場地，大約5分鐘就行到架喇，但如果喺中環站行過去呢，咁就要喺A出口出喇，慢慢行10分鐘都到。

仲有仲有，今次演唱會雖然開四面台，但係觀眾要先喺同一個閘入場，如果驚搵唔到入口，咁就要望住個摩天輪或者留意碼頭嘅鐘樓位置喇，因為入口其實就喺鐘樓對出，記者今日人肉測試過，由摩天輪行去入口位置大約只有30步。

裝束方面......無錯，雖然上台表演嘅係Leon而唔係你，但如果你即將會入場睇show，如果可以或者能夠嘅話，強烈建議你唔好着涼鞋喇，事關由入口行入場館，甚至人有三急要去廁所，有某啲位置會經過泥地，如果落雨加涼鞋，明㗎啦！至於，你買嘅$2980、$1980同$980嘅門票究竟坐喺邊？今日場內嘅櫈雖然未全部放好，但記者目測發現，坐「中半山」嘅觀眾，大約離台100米，放心，如果你視力正常，仲可以見到小小Leon企喺台嘅！