立法會內會主席劉健儀由歐洲回港，今日主持會議，八方問佢，點解早前咁唔畀面煲呔，六十個議員只得佢一個唔出現？
劉主席話，佢都好想去珠三角，因為個團對立法會嚟講好重要，但係佢同葉澍堃局長以及物流發展局嘅成員一早約好晒歐洲當地嘅官員同人士，日日都有會開，半路中途，根本冇法走得開。佢話自己有同葉局長反映過，大家都覺得好難咁遲改行程，就如常出發。
佢重講笑話，如果好似啲人傳佢去咗北京，佢一定會趕去廣州滙合煲呔，況且北京嘅官員都唔俾佢停留啦。
劉健儀佢哋一行今次去咗米蘭、馬賽以及巴塞隆拿，收穫甚豐。對於肥龍姍姍來遲，劉主席唔係好介意，總之嚟就得喇。一直有傳聞指田少同政府不咬弦，因為佢哋唔支持政改方案，身兼自由黨副主席嘅劉健儀就話絕冇其事，自由黨對政改嘅立場只有一樣，就係要均衡參與，冇話過一定唔接受肥龍方案喎。


爆料熱線：29290000、27860099
報料傳真：26239278
報料電郵：[email protected]