【新增回應及圖片】

林敏驄噚日喺紅館舉行入行35年作品展演唱會，可惜開騷前卻發塌台意外，造成9人受傷，演唱會受阻，要延至9時23分先正式開騷，今日凌晨12時許先完結。(新聞連結： http://bit.ly/2r50cQK )

今日《蘋果》聯絡林敏驄，對於噚日塌台令入場觀眾受影響，阿驄都感到非常抱歉，但因為有一些程序必須要完成，有關部門確定安全先可以開騷，俾觀眾入場。阿驄又話：「其實我噚日係最後一個知出咗事，因為大家唔想我擔心，困咗我喺房，我都奇怪點解咁耐都唔拜神。」

問升降台今晚會唔會用？佢話今晚個升降台雖然唔會用嚟升降，但都已經鞏固好，今晚亦都會有番dancers。佢話：「我都好唔好意思，除咗因為有人受傷，嘉賓都花咗好多時間排舞，好似伊健同基仔咁排咗好好睇嘅舞，點知噚日跳唔到。」問佢知唔知噚晚遲完show罰多少錢？佢就話唔清楚。

另外，《蘋果》亦向主辦單位大名娛樂了解情況，大名娛樂助理經理技安接受於電話表示：「今晚尾場演唱會有番dancers，除咗受傷嗰兩位之外，其他都可以表演，燈光方面都會完整番啲，至於升降台已經修理好，但可能要等到3點幾才決定用唔用，希望今晚照原定時間8點3可以開騷。」而草蜢的經理人公司表示，蔡一智仍在休息中，草蜢今晚不能演出，但蔡一傑會繼續獨唱。

噚日塌台受傷嘅蔡一智，今日接受蘋果訪問時話：「剛剛再看醫生，我的身體底子不錯，只要好好休息就很快痊癒，同時也祝福受傷嘅舞蹈藝員們快快康復！多謝大家關心！我會加油！」