陳庭欣(Toby)今日喺灣仔會展出席香港星級品牌2018啟動禮，佢早年曾同朋友喺銅鑼灣合資鐵板燒食店，最終執笠收場，佢話：「自己係一個創業失敗者，短期暫時唔會諗做生意，我計數好差，去超市買嘢都要拎個計數機出嚟計，對數字好唔醒目，所以要遇到生意上好好拍檔先可以再繼續創業。」

陳庭欣一向寵愛鸚鵡，佢希望效法日本人開鸚鵡餐廳，另一方面可以做慈善，覺得香港好多人都會著重於貓、狗，但雀仔就忽略咗，仲話：「自己儲咗一班雀友，唔係打麻雀個雀，係雀仔個雀 ，想喺呢方面出一分力打算去讀一個關於鸚鵡課程，要去澳洲，希望五年後實踐。」 陳庭欣家中都養咗隻鸚鵡，佢發現大家對鸚鵡同雀仔有誤解，覺得接觸佢哋就會有禽流感，其實係要經過深入了解就會知道。

之前陳庭欣因為要拍攝劇集，同其他女演員一齊泳裝上陣 ，要節食爭艷鬥麗，佢今日話：「場戲已經拍完，食咗大餐， 拍攝當日好曬好熱，自己都想跳落水 ，大家要留意呢一場戲，有朱晨麗、陳煒三個女仔着泳裝。」邊位最出眾？陳庭欣話：「女仔唔會留意呢啲，反而睇到煒哥件泳衣一字斜膊好靚，個款自己好鍾意。」

精選娛聞，喺晒《娛果》
http://fb.com/appledailyent