馮仁昭噚日發現陳奕迅（Eason）約埋霍震霆去金鐘打乒乓波，原來佢哋係為咗宣佈「陳奕迅MovingOnStageI演唱會」決定加開11月9同10號兩場，門券收益就撥捐香港2009東亞運動會營運基金。Eason仲自薦想寫首歌畀東亞運動會，希望出多分力，同霍生打完場友誼賽後，Eason話霍生啲「西」真係好厲害。

體力到極限

今次應該係最後一次加場，Eason話經已去到體力極點，暫時未知呢兩場會唔會加插啲運動元素，佢本人希望唔好有大改動，或者合唱《Weareready》。講到會唔會着運動衫演出，佢話自己身形最似摔角手，又好想着男體操衣。
至於大前晚佢睇千嬅演唱會突然喺台邊跳落兩米深台底，Eason話事後被保安叫下次唔好，佢哋負唔起責任，問到老婆有冇鬧，佢就話一句都冇講，兩公婆仲睇得好開心。對於千嬅同古天樂激吻環節，佢就覺得觀眾一向都鍾意睇呢啲嘢，不過佢唔會加插噃。至於霍生前妻朱玲玲被影到同羅康瑞拍拖睇戲，霍生噚日以趕去立法會開會為由婉拒做訪問鬆人。