大家都知道，跑快活谷賽事檔位的重要性，但其實又何止快活谷，相信全球大部份馬場包括沙田在內，中短途賽始終內檔馬慳位會有優勢。如果馬匹抽正內檔，還有好騎師執韁，當然可睇高一線。

今期(29日)沙田日賽，雷神莫雷拉的座騎，便連場排內檔，可謂如虎添翼，「中華主將」、「精算閃擊」及「邊個邊個」更是1檔起步，所以今期騎師王彩池如果唔買雷神，隨時冇錢收。

睇番數據，上季至今雷神跑沙田排1檔，上名率原來高達63%，而今次雷神的1檔座騎，實力亦非常強勁，如第九場三班1200米泥地賽，「精算閃擊」上仗排4檔於同班同程大勝，今次1檔更佳外，加了9分再戰，卻既不升班，負磅亦一磅不加，絕對是上風牌面馬。

至於第10場二班1400米的「邊個邊個」，同樣新勝同程，此駒體重僅1000磅左右，今仗升班減負11磅輕鬆不少，在港只曾5戰進步空間多，加上今次1檔因素，大有機會再下一城。

雷神本周六座騎排檔：
一場「架勢」　　8檔
二場「心思熟慮」3檔
三場「嫡愛摯寶」4檔
四場「越跑越好」13檔
五場「生生發發」12檔
六場「中華主將」1檔
七場「多多」　　10檔
八場「首飾大帝」4檔
九場「精算閃擊」1檔
十場「邊個邊個」1檔
註：「生生發發」、「多多」是跑直路賽，其餘是轉彎賽。