噚日中午傳出前特首曾蔭權將被起訴，八方正同立法會議員梁繼昌吹緊水，稱得上係稅務專家嘅Kenneth同八方講，佢年初去信英國稅局，指控特首梁振英收取澳洲公司UGL嘅5,000萬報酬但冇交稅，佢要求對方調查之後，收到英國稅局嘅回應，內容絕對唔hea處理，封信用字顯出英國方面相當認真。
Kenneth睇番佢同香港稅務局反映過呢件事，同樣要求對方調查，但稅局高層一直打官腔。
係咁死咬CY唔放嘅Kenneth話，喺佢即將派發嘅立法會工作報告入面，都會強調自己曾要求監管當局調查此事，睇得出Kenneth幾重視CY呢單嘢。