商台林海峰幫黃永新書《香港轉營》寫序，話每朝早都會諗，下一個會走嘅人係黃永抑或自己。家陣唔使諗已經有答案，黃永噚日宣佈離開商台，同一時間商台公佈7月起節目調動，本來做黃昏節目《左右大局》嘅李慧玲同郭志仁會返早主持一台《在晴朗的一天出發》，黃昏有新節目。

商台中人話黃永本來打算暫時退居幕後，忽然劈炮，有傳因為佢同李慧玲「炒大鑊」喎。商台中人否認，話黃永稱會先番加拿大休息。
有人向八方報料，話黃永可能「轉營」做副局長，目標係資訊科技局或環境局。佢做過AO，做主持時曾經鬧到新聞官喊，咁有威嚴，重返官場唔出奇。
八方噚日問黃永關於節目調動嘅事，佢話一概由商台外事部負責回應；至於有冇應徵副局？佢好似梁振英咁多次重複「你問外事部啦」。「問你有冇搵新工都係問外事部？」佢靜咗一秒後話無應徵；至於有冇人搵佢入政府，佢咁答：「好多人搵我做好多嘢，暫時未有決定。」