由中環去跑馬地要整整一個鐘，就知一定是近過年。街上毛都冇條，一定是清明加復活節，人人走頭。我自己很喜歡聖誕和過年。聖誕節是很歡喜的，買禮物呀，預備party呀，樹又掛燈，全香港都光了。最靚是半島酒店，全白色佈置，加上燈，真的好似有個White Christmas。我帶很多外地來的朋友去tea，大家都讚不絕口。不過一定要講一個半島頗好笑的規矩，大家是不可以站在半島大堂影相的，你可以一路行一路影，但不可以停低擺甫士！哈！不知是甚麼道理？！聖誕我覺得最討厭是我樓上的小朋友，每天都結結巴巴地在彈Christmas Carol、Christmas Eve足足彈了兩個多鐘，真攞膽！

除了塞車，過年很有人情味，難得一見一家人喜氣洋洋食飯，去拜年，更難一見是那些平時穿牛記笠記的年輕人也整齊起來。小時候，過年更有氣氛，蒸糕、煎煎炸炸，大家隔籬左右又會切四分一底糕互相交換，非常睦鄰。年廿八，一家總動員洗邋遢，那些古老大屋樓底很高，工人會用一支長竹，末端綁了一些像糭葉的乾葉來掃蜘蛛網，我便會帶着小布和㨘銅水去㨘香爐，姊姊哥哥們拿着報紙抹窗……清潔完畢，全屋會換上紅色的窗簾，紅色的咕𠱸套。年卅晚食完團年飯，便開新拖鞋。未必每年有新衣，但拖鞋一定新，最鍾意就是搣掉生膠底拖鞋的那塊玻璃紙，生膠拖新鮮落地是會黐地下的，好多時人行了去，拖鞋仍在兩步之後！！

我想了很久，為甚麼我們小時候不像現在天天吃生果呢？生果不是很有益嗎？答案實在太簡單，因為生果很貴，所以久不久才有西瓜吃，就連蘋果、橙、香蕉都少吃。所以特別喜歡過年。因為過年媽媽一定會買一箱柑，朋友又會送生果來。過年除了可以任食糖，最開心是任食生果。到現在仍喜歡買生果過年，感覺是很富有，很滿足！

大家要有富貴feel，一定要買來自日本信州的黃金啤梨，啤梨都未入口，就已經聞到啤梨的香味。啤梨最不好的地方是會「嚡」脷，但黃金啤梨不「嚡」脷的，又香又甜又多水！多水呀！發呀！

源興水果專賣店
地址︰九龍城衙前圍道110號A&B
電話︰2718 1103
營業時間︰24小時營業

（原文刊於2009年704期《飲食男女》）

蘇施黃Profile
資深電台人，天生異「口」，除了講嘢叻，食嘢同樣嘴刁，近年開咪、上電視做主持都不離教人食得精，吸引大批粉絲跟佢搵食。

立即免費下載《飲食男女》App ： http://onelink.to/etwapp
《飲食男女》網站 ： http://etw.hk