當年今日
關於我們

有得揀,一定住喺葵芳 | 阿榮

蘋果日報 2018/06/12 13:00

葵芳專欄阿榮地區消息蘋地葵涌廣場

大家好,我係阿榮。

如果要講到我最愛香港邊個地方,我諗我用0.09秒就會答你,葵芳!!!!

我由細到大就喺葵芳邨度住,經歷過葵芳邨重建、搬返入原址,喺嚟日本做嘢之前冇離開過葵芳生活,I am a Kwai Fong-ese! 

講起葵芳,點可以唔提葵涌廣場!!!

對於我嚟講,佢係一個充滿回憶嘅地方!!!

我仲好記得嗰陣,有個小學同學個阿媽叫佢個女唔好自己一個行葵涌廣場,佢話係好危險嘅地方!!!!我聽到之後真係「WHAT?!!?!?!?!」,咁確實葵涌廣場啲燈光問題,係搞到好似好雜咁嘅,家長會驚我都有少少明白,但對於我呢啲流住葵芳血嘅人,葵涌廣場真係一個叮噹,吖唔係,係多啦A夢嘅百寶袋咁,入面咩都有!!!

衫平得嚟靚多款,想買貴少少嘅,可以去潮流廊買,頂樓賣小食居多,我仲好記得,講起頂樓點可以唔提起「埋嚟試下味吖歡迎試雪糕!」佢簡直係葵涌廣場嘅legend!!!唔係葵芳友都一定聽過佢呢句嘢,即係睇字都有阿姨把聲喺個腦度響出嚟呀!

嗰陣跨區喺荃灣讀書,個個同學仔放學行返屋企,我就要搭地鐵返葵芳,有陣時見放得早,會喺葵涌廣場hea,放假嗰陣會同阿媽一齊去入面間大家樂食tea,或者係去輕鬆一下買碗生菜魚肉湯食!對於我嚟講,佢係一個充滿回憶嘅地方!!!頂樓嗰間影印舖仲有嗰間可麗餅都幾好味、地下仲未喺桌X入侵嗰陣會買齋食、錶冇電要換嗰陣會去2樓間錶舖換、買聖誕節交換禮物喺葵廣亂買、以前仲有好多漫畫舖嗰陣會去租勁多漫畫返屋企睇⋯⋯真係一諗起就勾返晒啲回憶出嚟!!! 

除咗葵廣,點可以唔提佢個老死,新都會廣場呀!佢啲衫褲鞋嘅舖頭總係老老地土又唔太抵(未裝修前),多數都係去搵食嘢多!!!

今年三月返香港嗰陣,去咗葵涌廣場一轉,好多鋪頭都變晒做專賣特色小食,然後成件事就係多人!!!!!!!新都會仲勁,大執到好似整咗容咁!!!而家入面啲舖頭變咗同其他普通嘅商場一樣,無論係旺角尖咀銅記都好,都係嗰啲鋪頭嗰啲牌子,一諗到呢到,好似以前嘅老土舖頭比較有特色⋯⋯

最勁嘅係佢仲整咗幾塊一睇就知係人工嘅人工草地,然後啲人會喺上面野餐同自拍,真係睇到我黑人問號出晒嚟,嗰度又窄又人工草地,仲要係個廣場嘅入面一撻吉地only,咁都野餐得????仲要影晒相放上網????可能潮流嘅嘢我唔曉啦~

以前葵廣多數都係街坊街里多,而家多咗好多非葵芳人嚟振興葵芳經濟,葵廣就嚟可以成為第2個旺中,對於葵芳人嘅我嚟講,唔知點解覺得有啲悲哀⋯⋯ 

不過點都好,喺葵芳住真係好方便,地鐵沿線去邊都好快、去機場一程巴士半個鐘度咋!想買平嘢有葵廣,想買貴嘢牌子嘢有新都會,然後佢哋兩個勁近,真係過一過條天橋就係!如果再有得畀我揀住喺香港邊度,我都會揀葵芳!!!!

專欄作者簡介:
阿榮
喺日本大阪生存緊嘅香港人,做緊間廣告agency。曾經將喺石川縣活過嘅地獄天堂史寫咗本叫《25歲,日本打工血淚史》,間唔中會喺個叫《25歲,我去咗日本做嘢,點知⋯》嘅page度講無聊嘢。

做人最緊要熱血,只要有得瞓同聽音樂就乜都得。

Facebook專頁:
https://www.facebook.com/winginjp/

發掘更多身邊的小城故事,請LIKE 蘋地 Facebook Page,並設定為「搶先看」: https://www.fb.com/appledailyland