長沙灣泓景臺毗鄰「面壁樓」一號．西九龍，價單都出了，示範單位卻遲遲未開，只在紅磡開了個展覽廳作招徠。單從平面圖構想一下，除了廳房無一倖免有特大窗台外，部份窗台還要望樓景，但不是別人的樓，是望返自己層樓！當發展商在樓盤廣告前豎起大姆指時，究竟有冇小小唔好意思呢？

客廳窗口望主人房

至截稿前，長實旗下一號．西九龍，先後推出110伙，即供最平建築面積呎價逾9000元，戶戶過千萬。買家大抵都預咗跟泓景臺你眼望我眼，但再睇真啲，名字起得美美的第一座「玲瓏邸」，客廳景觀竟然半個窗口都望番自己層樓（詳見平面圖），「享有」半個天井景；D室仲離譜，窗口幾乎全部被自己樓遮晒，更趣致是與主人套房的窗口對望，換言之，稱得上單位靈魂的廳區與主人房，就由兩個窗口近距離自己望自己。
這種自望窗，最宜充滿情趣的激情兩口子，各處一窗大跳求偶舞，真有心思。這個來自1座D室的「靚則」，低層最平定價1175萬元，實用面積872方呎，實用面積呎價13475元，心動嗎？另外，屋苑全數54個車位亦會推售，售價113萬至120萬元。