IGG（799）終於出業績啦，同時出埋澄清公告：劈頭第一段就話，業績早洩「乃由本公司委聘的公關公司（「公關公司」）管理的移動網絡平台所洩露。」見到呢句，就知IGG對於皓天（1260）將佢早洩呢單嘢有幾嬲啦！

早洩喎！梗係嬲！其實香港耐唔時都會出現業績早洩事件，一齊愛回帶之開心速遞。

2017年：騰訊（700）旗下騰訊證券，「偷步」公佈騰訊業績，足足早港交所（388）近半粒鐘。好彩嘅係，業績早洩極都係trading hour外。內地媒體4點28分公佈；騰訊證券4點34分公佈；至於港交所就4點59分先有。三日後，騰訊先道歉。

2013年：國資委於網站，喺下午3時02分，提早洩露聯通（762）中期業績。喂！港股都未收市，唔睇由是可，一睇！嘩！業績遠勝預期，成班聰明錢就衝去掃高聯通，半粒鐘一度抽高近5％，成交金額佔全日五成！

結果，聯通下午3時32分停牌，時任聯通董事長兼首席執行官常小兵因此一日內兩次道歉。

講開常小兵，2016年被雙開。2017年5月，法院宣判常小兵收受賄款376萬人仔，依法判處有期徒刑六年。

2013年：中國神華（1088）A股原本夜晚公佈業績，但晏晝時有網民發現，呢份未正式公佈嘅業績，被人當垃圾掉咗喺影印舖，最後仲俾人影晒相放上網。不過，批相upload上網時間唔係交易時段，所以未算好大鑊。

今次Wonderful Sky 將IGG GG，相信一定可以於「經典業績早洩事件簿」中佔一席位，只有14億市值嘅皓天，竟然可以同一眾國企、騰訊齊名，實在可喜可賀，我真係恭喜你呀！而皓天，今日升逾半成！叻仔！

By千頌C
http://fb.com/winbigwok