林煒珽（Veronica）在媒體新聞的篇幅，認知的身份大都是人稱「大少」、大名娛樂老闆林建名的三女、林百欣的孫女，近年就幫手打理家族生意，在大名出任執行董事，主力做創意推廣的範疇。其實娛樂公司以外，她還有另一身份，就是攝影師，她在IG的資料，她簡介自己是一名「Photographer Artist」，有一個叫VL Visuals的攝影網址，分享她的攝影作品，多以世界各地風景及lifestyle為題材，日前在中環舉行了首個個人攝影展。

影相多年，為何現今才辦攝影展，Veronica表示：「其實，每兩年我都會搞一個攝影展，之前都係joint，兩年前諗自己可以做啲嘢，上年因為要搞婚禮，所以唔得閒，到年尾，有間gallery問我想唔想搞一個個人攝影展，我就講『你幫我就得』，因為我一個人係做唔到既。」打理家族生意，要與商業元素為考慮，她做攝影就可以多一點屬於自己的個人空間及自由度，如攝影展其中一個以瑜伽為題材的照片，她找了瑜伽導師好友梁惠婷做她的拍攝對象，以光影勾畫身體線條，當中她僅以數元買的垃圾膠袋做道具，包裹著對方的半裸身體為造型，相當有創意。

Veronica於中學開始，因父親送上一部卡片型相機給她而開始迷上攝影：「我就隨身帶住去影相，後尾像素太低關係，要求又越嚟越高，咁就買咗部大機啦，玩DSLR，爹哋都有買好多書畀我，但係影相係唔須要睇書，你練得多就ok，每樣嘢都係度不斷試，頭先我影人郁緊時候嘅影，我唔係想影個人，我想影個影，所以要佢不斷郁。」愛上攝影，她鍾愛Multiple exposure的多重曝光的攝影風格，如展覽首日，她在未開幕前搵了公司旗下藝人陶枳樽做模特兒，捕捉她遊走作品的重疊身影，她曾在紐約名府Parsons School of Design修讀黑白菲林的短期課程，卻從未打算將攝影當做職業：「要影commercial嘅嘢係唔啱我，因為鍾意以我角度去影相，唔係為其他人而影相，商業係人哋要以某一個角度，將嗰張相跟番佢嘅角度，我想以自己角度影相。」

在家中排第三，自小父親已灌輸數學要好同精，亦受到影響，在英國讀大學時，就修讀了較冷門的統計學：「全班有二十個人，夾埋我讀呢科有三個，如果讀經濟，係有百幾人，最初我諗過讀Arts，後來發覺Arts係隨心嘅嘢，讀啲可能將來有用嘅嘢，可能統計學係有用啩，嗰一刻覺得有用，原來發現唔係，我都辛苦咗好耐，辛苦咗三年，我又無出街，好多course work，不過都學咗用理性分析。」畢業後，她去了銀行工作兩年，就發現不適合，加上父親年紀大，加上她亦愛音樂及電影，就決定返去他的娛樂公司幫手，成為最年輕的員工，她笑言：「我每樣都有掂，佢都好多問我意見，因為公司主力無咩人做creative，我喺公司最後生，通常都係後生人去接。」

隨着父親年紀大，她與家姐及弟弟都分擔不同的家族生意，提到指定問題，父親是你的上司會有磨擦嗎，Veronica笑言為了大家開心才一齊工作：「以前會有argue，不過而家大家方向都係一致，而家冇，以前都有『拗』，每人都講吓啲道理，佢好想做嘅嘢，就算唔make sense都去做，有陣時執著係正常，每個人都係執著嘅時候，會唔會profit，好多嘢都係搏出嚟，做落先知。」從爸爸的身上，她佩服對方的活力十足：「我鍾意佢唔會攰，好energetic，我個人成日都好攰，佢都80幾，仲有好多精力周圍走，如果唔喺公司，都喺廣州公司，同去咗旅行，佢啱啱喺西班牙，我哋體力唔係咁及佢，佢都鼓勵我鍾意做就做，唔好影響到公司就得，佢叫我做咩都要勤力啲，唔好咁懶。」

對於攝影，她還有很多範疇想嘗試，如建立影菲林的耐性，更想去做電影工作，她表示：「未知想做咩崗位，會慢慢研究下。」最後，問到她剛結婚，外籍丈夫Steve會否影響她追求自己的理想，她笑言：「結咗婚同無結婚差唔多，只係一齊住，佢有鼓勵，唔好成日出國就得，佢覺得應該成日要一齊喺香港。對於攝影，佢好有意見，不如用另一方式去試，好多時佢建議咗方式我都去試。」

採訪：梁錦雯
攝影：陳慧安
攝錄：林德雄

《蘋果動新聞》訂閱新世代，4月開始免費訂閱，現在接受登記！
http://bit.ly/2Ja3IXw
-----------------------------
星期一至五晚上10點半
《動腦Q》Let's Q the money！
http://bit.ly/2QW8LcI